Naomh Marcas
Bunaíodh CLG Naomh Marcas sa bhliain 1975 in Achadh an Tobair in iarthar Thamhlachta. Ó shin i leith, tá an cumann imithe ó neart go neart agus ní hiontas é go bhfuil an teist amuigh air anois go bhfuil sé ar cheann de na cumainn is fearr i mBaile Átha Cliath. Den chéad uair riamh, beidh an fhoireann peile agus iománaíochta i Roinn 1 agus is beag cumann atá ann go bhfuil an phribhléid sin acu.
Tá na trí chraobh iománaíochta bainte amach againn le blianta deaga anuas: Sóisir A (2004); Idirmheánach (2005); agus Sinsir B (2006). Is cinnte gur éacht mór é sin! Tá stair na peile mar an gcéanna. Bhuamar Roinn 3 (2003), Roinn 2 (2004) agus sa bhliain 2005 bhíomar sa chluiche cinniúna chun Roinn 1 a bhuachan. Faraor ní raibh an rath céanna ar an bhfoireann an lá sin ach táimid dóchasach i gcónaí!
Tá formhór na ndaoine atá ar an bpainéal peile ar an bpainéal iománaíochta chomh maith, rud a fhágann go bhfuil dlúthchaidreamh idir na himreoirí agus go bhfuil meanma ard sa chumann. Ag an am céanna, cuireann sé seo brú mór ar na himreoirí agus, toisc go bhfuil beirt ar fhoireann peile Bhaile Átha Cliath agus beirt eile ar an bhfoireann iománaíochta againn, cruthaítear a thuilleadh brú ar na himreoirí agus ar an mbainistíocht.
Tá cáil bainte amach ag Naomh Marcas mar chumann paróiste, bua nach bhfuil ag cumainn go leor eile i mBaile Átha Cliath. Is gné an-tábhachtach den Chumann Lúthchleas Gael é seo agus ní mór do gach cumann áitiúil aghaidh a thabhairt ar an sprioc sin. Ba mhór an chabhair é gur tógadh foirgneamh breá nua don chumann sa bhliain 2002. Feidhmíonn sé anois mar Ionad an Phobail le haghaidh mhuintir iarthar Thamhlachta. Is beag oíche nach mbíonn an halla lán go doras le himeachtaí éagsúla ó bhiongó go damhsaí. Is é an ghné seo den chumann thar aon ní eile a fhágann bródúil mé go bhfuilim ag imirt le Cumann Naomh Marcas.
Ciarán Mac Fhearghusa,
Cumann Naomh Marcas,
Iarthar Thamhlachta,
Baile Átha Cliath.
Cumann Báire Chromghlinne
Foireann Shinsearach Chromghlinne.
Tá traidisiún na gcluichí Gaelacha i gceantar Chromghlinne le fada an lá. Is í an iománaíocht amháin a imrím féin, agus bainim taitneamh thar na bearta aisti. Bainim sásamh as a bheith ag traenáil ar leibhéal ard leis an gclub, cé go mbíonn an traenáil dian dúshlánach.
Bhain an fhoireann iománaíochta faoina sé déag, ar a rabhas féin ag imirt, craobh Bhaile Átha Cliath siar sa bhliain naoi déag nócha hocht. Ócáid stairiúil ab ea an cluiche sin don chlub. Bhí mise ag imirt mar leathchúl ar chlé an séasúr sin, agus bhain mé an-taitneamh as an gcraobh ina hiomláine. Cé nach raibh an cluiche ceannais féin ar an gcluiche ab fearr an bhliain sin sa chraobh, bhí bliain iomána den chéad scoth ag an bhfoireann.
Tá cuid mhaith den mheitheal imreoirí a bhí ag imirt an bhliain sin ag imirt anois leis an bpainéal sinsearach sa chlub, agus cuid eile acu leis an bhfoireann idirmheánach. Tá sinsir iománaíochta Chromghlinne ag imirt sa chéad roinn i mbliana sa chraobh agus sa tsraith, agus tá gach duine den mheitheal imreoirí ag tnúth le dúshlán gach iomaíochta a thabhairt. “Come on the parish!” a chloistear go hiondúil ó lucht leanúna Chromghlinne, agus tá cúis mhaith leis sin. Is paróiste iománaíochta an fhoireann i gCromghlinn, agus cé nach bhfuil cónaí orm féin i gCromghlinn, is cuid den ‘pharóiste’ sin mé.
Is bua ar leith de chuid CLG é go bhfuil an saghas sin tábhachta ag baint le foireann iománaíochta, dar liom. Níl rud níos fearr ná dul amach ar an bpáirc agus dúshlán iománaíochta a thabhairt le paróiste iománaíochta Chromghlinne. Bhain mé mo chéad bhonn sinsir anuraidh le Cromghlinn, in ilchomórtas Charlie Smith, agus tá súil agam gur bliain rathúil ar leith a bheidh ann do Chumann Báire Chromghlinne i mbliana.
Oisín Uíbh Eachach,
Cumann Báire Chromghlinne,
Baile Átha Cliath.
Oisín Uíbh Eachach, Cumann Báire Chromghlinne.